தவற விட்டு விடக்கூடாது

அகில உலகின் மிக முக்கிய பிரபலத்தின் தரிசனம் 

கை கொடுக்கவும் போட்டோ எடுக்கவும் அங்கிருந்த கூட்டம் அவரை நெருங்க

நெரிசரில் அகப்பட்டு விடாமலலும்

தரிசனம் கெடுபட்டு விடாமலும் 

தோளில் மீனுக்குட்டியுடன் ஒரு ஓரமாய் நின்றேன்

ஏஏஏஏ.  ரெயின்போ பார்!

 ரெயின்போ பார்!

தன்னிலை மறந்து வான்நோக்கி பார்க்கச் செய்தாள்  மீனுக்குட்டி

                              ~அகல்

தேடல்

தேடல்கள் தீர்ந்தபாடில்லை...

நெருப்பின் தேடல் அடுத்த விறகை நோக்கி..

ஆகாயத்தின் தேடல் அடுத்த மேகத்தை நோக்கி..

நிலத்தின் தேடல் அடுத்த மனிதனை நோக்கி..

தேடல்கள் தீர்ந்தபாடில்லை..

                          ~எழில்

காதலின் முகங்கள்

உரையாடல்...

நீளும்.. சலிக்காது..

தீண்டல்...

தித்திக்கும்.. திகட்டாது..

ஊடல்..

உரைக்கும்..உடைக்காது...

காதல்..

தேடும்.. தொடரும்...

                    -எழில்

அன்பின் மலர்

எப்போதும் பார்த்து சிரிக்கும்

லிப்ட் ஆப்பரேட்டர் தான்

இன்று ஏனோ என்னால் முடியவில்லை... 

முகத்தை இறுக்கமாக வைத்துக் கொண்டேன்! 

மேனேஜரிடம்

வாங்கிய வசையை

யார் மீதும் செலுத்தும்

வேகம் இருந்தது...

என் இரையாக

அந்த ஆப்பரேட்டர் அண்ணாவும்

மாறக்கூடும்...

இது எதுவுமே தெரியாத

அந்த அண்ணா

எப்போதும் போல கேட்கிறார்

"சாப்டீங்களா தம்பி" என்று! 

எந்த காரணமும் இன்றி

அழ வைக்கவும்

எந்த காரணமும் இன்றி

அணைத்துக் கொள்ளவும்

பூக்கள் நீட்டவும்

யாரோ ஒருவர்

இருந்து கொண்டே இருக்கிறார்கள்... 

                             ~மகி

மின்மினி

முகமோ 

முகவரியோ தெரியாதவர்கள் தான்

வழிநெடுக வராவிட்டாலும்

அவ்வப்போது வந்து

வாழ்க்கைக்கு தேவையான

ஒளிக்கீற்றை தந்து போகிறார்கள்

அந்த மின்மினி போல... 

                             ~ மகி

யாரோ ஒருவர்

தனக்கு யாருமே இல்லை

என்று புலம்புகிறவர்கள் எல்லாம்

யாரோ ஒருவரை

தனக்கு எல்லாமாகவும்

யாரோ ஒருவருக்கு

தான் எல்லாமாகவும்

நினைத்தார்கள் தான்... 

உண்மையில் 

யாரோ ஒருவர்

யாரோ ஒருவருக்கு

இருந்து கொண்டு தான்

இருக்கிறார்கள்... 

                            ~மகி

துணைவன்

என்னை உனக்கு எவ்வளவு பிடிக்கும்? 

என்ற கேள்விக்கு

இன்னும் பதில் வரவில்லை! 

பிடித்திருந்த என் கையை

இன்னும் கெட்டியாக

பிடித்துக் கொள்கிறார் சிரித்தபடி... 

இதற்கு மேலும் பதில் வேண்டுமா??? 

                                   ~மகி

வெறுமை

ஓடாத ஓடை

தேங்காத குளம்

சலசலக்காத நதி

அலையில்லாத கடல் போல

ஒரு வாழ்க்கை

அவள் இல்லாத வாழ்க்கை

                      ~மகி

அன்பின் மழை

சுட்டெரிக்கும் வெயிலில்

பிளாட்பார நிழலில் அமர்ந்து

தன் இருபது மகனுக்கு

தலை சீவி விடும் அவளுக்கும்

தன் எழுவது மனைவியை

மெல்ல கை பிடித்து செல்லும்

அந்த பார்வையற்றவருக்கும்

தெரிவதே  இல்லை வெயில்! 

உண்மையில்

அன்பின் மழைக்கு

வெயில் தெரியாது!

                                 ~ மகி

அன்பின் எச்சம்

அவர்கள் சந்தோஷமாகவோ

துக்கமாகவோ

 தனிமையாகவோ இருக்கும் போது

அவர்களிடம் நமத்துபோயிருந்த

அன்பின் எச்சத்தை தருகிறார்கள்

நாய்க்கு போடும் ரொட்டியை போல! 

சில சமயம் தடவி விடுகிறார்கள்! 

கொஞ்சவும் செய்கிறார்கள்! 

எல்லாம் அந்த நொடி மட்டுமே! 

இது எதுவுமே தெரியாத நாய்

அடுத்த நாள் சென்று

அன்பின் எச்சத்திற்காக காத்திருந்து

திரும்பி வருகிறது! 

மீண்டும்! மீண்டும்!

                               ~மகி

எதிர்பார்ப்பு

என் அதிகபட்ச எதிர்பார்ப்பு

உன்னுடைய இருத்தல் தான்! 

எல்லா நேரங்களிலும் இல்லை என்றாலும்

மனம் கசிந்து அழும்போது மட்டுமாவது! 

என்னை ஆற்றுப்படுத்தவோ

ஆறத்தழுவவோ வேண்டாம்! 

நான் அழுகிறேன்

நீ இரு போதும்! 

                             ~மகி