நம்புங்கள்!
சரியோ தவறோ ஆணித்தரமாக நம்புங்கள்!
மற்றவர்களையும் நம்ப வையுங்கள்!
நம்பிக்கையின் அடிப்படையில் தான்
எல்லாம் முடிவு செய்யப்படுகிறது!
நீதியும், நீதிமன்றங்களும்
மட்டும் அதற்கு விதிவிலக்கல்ல!
ஒருவர் பிறந்திருக்கலாம் என்ற நம்பிக்கை
இன்னொருவர் இறந்த உண்மையை விட
வலிமையானதாக மாறலாம்!
எல்லாம் அதை
நம்புபவர்களின்
எண்ணிக்கையிலும்,
அவர்கள் வகிக்கும் பதவிகளிலும்,
அவர்களின் ஆயுதங்களிலும் இருக்கிறது!
எனவே நம்புங்கள்
நம்பிக்கையின் பெயரில்
உங்களுக்கான நீதி வழங்கப்படும்!
நம்பிக்கை அதான எல்லாம்!
பி.கு.: இந்த கவிதையில் வரும் சம்பவங்கள் அனைத்தும் கற்பனையே.யார் மனதையும் புண்படுத்தும் நோக்கத்தோடு எழுதப்பட்டது அல்ல!
-மகி
மரங்களுக்கு மட்டும் அன்றி
மனிதருக்கும் வேண்டும்
இலையுதிர் காலம்!
நம்பியவரெல்லாம் விலகிப் போனால்
நாமும் மொட்டை மரம்தான்!
இது யாரின் குற்றம்?
உதிர்ந்து சென்ற இலையின் குற்றமா?
உதிர விட்ட மரத்தின் குற்றமா?
உதிர்த்து விட்ட விதியின் குற்றமா?
தெரியவில்லை!
இவ்வளவு தான்
மரத்திற்கும் இலைக்கும்
உள்ள சொந்தமா?
இல்லை! இல்லவே இல்லை!
உதிர்ந்து விடும் என்று தெரிந்தும்
இலைக்கு இடம் கொடுக்கும் மரம்!
உதிர்ந்த பின்னும்
மரத்திற்கு உரமாகும் இலை!
இவைகளை போல
அன்பு செய்ய
நமக்கும் வேண்டும் ஒரு
இலையுதிர் காலம்!
-மகி
யாரிடமும் சொல்லிக் கொள்ளாமல்
தனியாய் சென்ற adult சினிமாவில்
பக்கத்து இருக்கையில்
என் ஆசிரியரை
கண்ட போது
என்ன சொல்ல.....?
மாத கடைசி, பணம் இல்லாத நேரம்
காதலியின் பிறந்தநாள்,
ஓசி தம் ஒன்றை பரிசளித்து,
"இத்தோடு இப்பழக்கத்தை
விட்டு விடுகிறேன்"
என்று சத்தியம் செய்தேன்.
அவள் முகம் மலர்ந்தாள், "உண்மையா" என்றாள்
என்ன சொல்ல....?
எப்போதும் செய்யும் தவறுகளை
எண்ணிக் கொண்டு
நான் மூடன் என்பதை உணர்ந்த பின்பும்,
"நீ மட்டுமே முட்டாள்" என்று சில
அறிவி ஜீவிகளின் புலம்பல்களை
கேட்ட பின்
என்ன சொல்ல......?
இரவு 11ஐ கடந்த யாருமில்லா சாலை,
புகைத்துக் கொண்டே
காலார நடை பயணம்,
எதிரில்,
யாரோ முடிவு செய்த அழகை தனக்குள்
கொண்டு வர செய்த மேக்-அப் உடன் ஒருத்தி
"இன்னைக்கு நைட் என் கூட இருங்க,
கையில இருக்கிறத கொடுங்க,
நாளைக்குள்ள என் மகளுக்கு ஃபீஸ் கட்டணும்" என்றாள்,
வந்த விலைமகளிடம் என்ன சொல்ல......?
-அகல்
குருதித் தாகம்...
தானமில்லை, தாகம்தான்
எனக்கு!
நான் காட்டுமிராண்டியோ,
காட்டேரியோ என்னவென்று
எனக்கு சொல்லத் தெரியவில்லை!
என்னோடு இருந்த
எனக்காகவே இருந்த
உன்னையும் அழவைத்துப் பார்த்தேன்!
எனக்காக நீ தூக்கம் தொலைத்த
இரவுகள் அறிந்தும்
மீண்டும் வலி கொடுத்தேன்!
எனக்குப் பிடித்ததை செய்து
எனக்குப் பிடித்ததையே நீ
உண்டபின்னும் உன்னை
எட்டித்தான் உதைத்தேன்!
சொல்லப்போனால்
தினம் தினம் உன் இரத்தத்தை
உறிஞ்சிக் குடித்தேன்!
அவ்வளவு தாகம் எனக்கு
குருதித் தாகம்!
ஆனால் முடிந்தால்
இன்னொரு வாய்ப்புத்தாயேன்!
ஐந்து வருட கொடுமைக்காரனுக்கு
மீண்டும் வாய்ப்பு கொடுக்கும் நீ
பத்து மாதம் வலி தந்த எனக்கு
கொடுக்கமாட்டாயோ?
உன் உதிரத்தில் உதித்து
குருதியை குடித்து
உலகிற்கு வந்தவள்,
மீண்டும் ஒருமுறை
உன்னை அழவைக்கமாட்டேன்!
-இருதயா
அகில உலகின் மிக முக்கிய பிரபலத்தின் தரிசனம் கை கொடுக்கவும் போட்டோ எடுக்கவும் அங்கிருந்த கூட்டம் அவரை நெருங்க நெரிசரில் அகப்பட்டு விடாமலலும்...
